Tónleikauppfærsla af nýrri kammeróperu eftir Önnu Halldórsdóttur við ljóðabók Elísabetar Jökulsdóttur, Ástin ein taugahrúga - Enginn dans við Ufsaklett. Kammeróperan er fyrir mezzosópran, selló og rafhljóð og er í uppsetningu sviðslistahópsins Spindrift Theatre. Flytjendur verksins eru Tinna Þorvalds Önnudóttir, söngkona og Júlía Mogensen, sellóleikari.

Hvað gerir man ekki til þess að tilheyra? Fá að vera með?
Verkið er þroskasaga konu og barátta draumsins við raunveruleikann. Þessi barátta er spegluð í ofbeldisfullu ástarsambandi frá upphafi til enda og við veltum fyrir okkur: hvað er það sem gerir man að “alvöru konu” -  Og hvar leynist hinn raunverulegi lykill að öllu saman?
Söguhetjan er með geðhvörf sem litar frásögnina þannig að úr verður rússibanareið á milli alsælu og dýpsta þunglyndis. En hvort sem persónan er stödd á toppnum eða botninum er kímnin aldrei langt undan.
Tónlist Önnu Halldórsdóttur gefur textanum nýja vídd og er bæði grípandi og aðgengileg. Segja má að hún höfði til breiðs markhóps og geti jafnt fangað athygli þeirra sem hafa lítið hlustað á óperur, sem og óperuáhugafólks.

Flytjendur:

Tinna Þorvalds Önnudóttir Mezzósópran og Júlía Mogensen sellóleikari

Spindrift Theatre er finnskt-íslenskt sviðslistakollektív, stofnað árið 2013 og samanstendur af sex sviðslistakonum. Tvær þeirra, Tinna og Bergdís Júlía, standa að þessu tiltekna verki hafa fengið til liðs við sig magnaðan hóp.

Tinna Þorvalds Önnudóttir útskrifaðist með BA gráðu í leiklist árið 2010 og hefur frá árinu 2012 stundað klassískt söngnám hjá Alinu Dubik, mezzósópran. Hún er því útlærð bæði leik- og söngkona og leitast við að finna tilraunagleðina í óperuforminu.

Bergdís Júlía Jóhannsdóttir er leikstjóri sýningarinnar en hún útskrifaðist með BA gráðu í leiklist árið 2013. Hún hefur víðtæka reynslu bæði sem leikkona og leikstjóri, og leikstýrði núna síðast Tónleikhúsverkinu: „Skemmtilegt er myrkrið“ eftir Elínu Gunnlaugsdóttur í Hörpu.

Anna Halldórsdóttir er tónskáld verksins en hún hefur hlotið Íslensku Tónlistarverðlaunin auk annarra viðurkenninga fyrir verk sín. Hún hefur sent frá sér þrjár hljómplötur með eigin tónlist og unnið að tónlist og hljóðmynd fyrir kvikmyndir, heimildamyndir og leikhús.

Júlía Mogensen er klassískt menntaður sellóleikari, sem hefur átt í fjölbreyttu samstarfi við breiðan hóp listamanna hér heima og erlendis. Júlía lærði við LHÍ og í London, við Guildhall School of Music & Drama og lauk síðar tveggja ára námi í Berlín. Hún var meðlimur Sinfóníuhljómsveitar Íslands og Íslensku Óperunnar frá árunum 2013-2019.

Elísabetu Jökulsdóttur þarf ekki að kynna en fyrsta bók hennar, ljóðabókin: „Dans í lokuðu herbergi“, kom út árið 1989 og síðan hefur hún sent frá sér fjölda bóka, ljóð, sögur og skáldsögur. Hún hefur einnig skrifað fjölda leikrita sem sett hafa verið upp hér á landi og erlendis. 

https://www.facebook.com/SpindriftTheatre

https://www.instagram.com/spindrifttheatre/

http://spindrift.team/