Upplýsingar um tónleikana
Caput flytur verk eftir nokkur íslensk tónskáld á tónleikum í Kaldalóni, Hörpu.
Efnisskrá tónleikanna
Flux 173 eftir Hauk Tómasson ‘8
Music to accompany your sweet splatter dreams eftir Báru Gísladóttur ‘6
Þan eftir Kristján Guðjónsson ‘17
Hlé
Coda eftir Hauk Þór Harðarson ‘17
adoS eftir Halldór Smárason ‘10
Hlé
Ecognosis eftir Bergrúnu Snæbjörnsdóttur ‘25
Um verkin
Flux 173 (2021)
Hægt er að líta á Flux sem eitt verk eða hóp af tengdum verkum. Verkið er samið fyrir 1-8 hljóðfæri og má flytjast af hvaða samsetningu sem er, einnig sem einleiksverk. Hljóðfærin í pottinum eru flauta, óbó, klarinett, slagverk, harpa, píanó, fiðla og selló. Mögulegar útgáfur eru 255 og hér verður flutt útgáfa fyrir kvintett, Flux 173. Nafnið Flux (flæði, fljótandi ástand) vísar til þess hvernig efni verksins seytlar milli hljóðfæra og meðspils og þeirrar staðreyndar að verkið gefur hljóðfæraleikurum nokkuð frjálsar hendur.
Þan er samið fyrir Caput hópinn árið 2019 og var ætlað til flutnings á vordögum 2020. Ekki varð af þeim flutningi vegna faraldursins sem um það leyti var að hneppa þjóðlífið í bönd. Verkinu má skipta uppí sex samhangandi hluta eða hugmyndir sem allar byggja á skyldu tónefni. Grunnefniviðurinn er 6 tóna mengi sem myndar eins konar DNA verksins og tónvefurinn sprettur af. Tónmiðjur mynda þráð í gegnum verkið. Í sumum tilfellum eru þær ekki heyranlegar en mynda eins konar hulinn hverfil sem knýr framvinduna áfram.
Um flytjendur
CAPUT hefur talsverða sérstöðu í íslensku tónlistarlífi; var formlega stofnað árið 1988 og hefur frá upphafi sérhæft sig í flutningi samtímatónlistar. Fjölmörg íslensk tónskáld hafa skrifað verk fyrir Caput og hópurinn flutt og hljóðritað mörg meistarastykki eldri tónskálda en einnig frumsmíðar yngstu tónhöfunda.
CAPUT hefur tekið virkan þátt í tónlistarlífi Norðurlandanna og Evrópu, farið í margar tónleikaferðir og hljóðritað verk norrænna og evrópskra tónskálda. Einnig hefur hópurinn farið í tónleikaferðir til Japan, Kína, Bandaríkjanna og Kanada og ávallt flutt verk íslenskra tónskálda í bland við verk alþjóðlegra samtímatónskálda. CAPUT er gjarnan talið meðal helstu flytjenda samtímatónlistar í Evrópu og hefur sem íslenskur hópur haft það að leiðarljósi að kynna íslenska tónlist á alþjóðavettvangi. Hópurinn hefur tekið þátt í fjölda norrænna og alþjóðlegra samstarfsverkefna og komið fram á tónlistarhátíðum á borð við Holland Festival, Gulbenkian Festival, Warsjárhaustinu ásamt öðrum. Caput hefur hljóðritað tónlist fyrir mörg alþjóðleg útgáfufyrirtæki og má þar á meðal nefna; BIS, Naxos, Deutsche Grammophon og Sono Luminus.
Stjórnandi: Guðni Franzson
Að loknu einleikara- og tónfræðaprófi frá Tónlistarskólanum í Reykjavík hélt Guðni til framhaldsnáms í Hollandi og hlaut til þess meðal annars Léonie Sonnings verðlaunin. Guðni hefur víða komið fram sem einleikari og hljóðritað fjölda geisladiska með nýrri og klassískri tónlist ásamt því að leika og hljóðrita þjóðlega tónlist með Rússíbönum. Guðni var einn af stofnendum CAPUT árið 1988 og stýrir gjarnan hópnum á tónleikum og við hljóðritun en vinnur líka á stundum með Sinfóníuhljómsveit Íslands og evrópskum hljómsveitum og kammerhópum.
Samhliða hljóðfæraleiknum vinnur Guðni sem tónsmiður, að mestu fyrir leikhús og dans. Tóney er skapandi vettvangur fyrir tónlist og hreyfingu sem Guðni stofnaði árið 2007 og starfrækir með hópi valinkunnra listamanna.
Um tónskáldin
Kristján Guðjónsson stundaði nám við tónfræðabraut Tónlistarskóla Reykjavíkur, þaðan sem hann útskrifaðist með próf í tónsmíðum árið 2004. Árið 2011 lauk hann MA prófi í tónsmíðum frá Listaháskóla Íslands. Verk Kristjáns hafa m.a. verið flutt á Ung nordisk musik (UNM) tónlistarhátíðinni, í tónskáldastofu Sinfóníuhljómsveitar Íslands og víðar. Kristján hefur einnig samið tónlist fyrir leikhús og útsett og samið tónlist fyrir kvikmynd og tölvuleik. Meðfram tónsmíðum starfar Kristján sem tónlistarkennari í Reykjavík.