Kammersveit Reykjavíkur slær lokahljóminn á Myrkum músíkdögum að vanda. Á efnisskrá eru frumflutningur á nýjum bassklarinett-konsert eftir Huga Guðmundsson, þar sem Rúnar Óskarsson leikur einleik; frumflutningur á nýju verki: Balaena, eftir Ingibjörgu Ýri Skarphéðinsdóttur og einnig verður leikið verk eftir Daníel Bjarnason: All sounds to silence come. Kammersveitin er sérlega stolt af því að bjóða hingað til lands norska hljómsveitarstjórann Christian Eggen, listrænan stjórnanda Oslo Sinfonietta.

Efnisskrá 

Ingibjörg Ýr Skarphéðinsdóttir: Balaena — frumflutningur, 15-18’
Daníel Bjarnason: All sounds to silence come (2007), 15’
Hugi Guðmundsson: AUX, konsert fyrir bassaklarinett og kammersveit — frumflutningur, 18’

Kammersveit Reykjavíkur var stofnuð 1974 og hefur síðan haldið reglulega tónleika með kammertónlist, allt frá barokktímanum til nútímans. Markmiðið með stofnun hennar var að gefa áheyrendum kost á reglulegum tónleikum með kammertónlist og um leið að gefa hljóðfæraleikurunum tækifæri til að glíma við áhugaverð verkefni. Óhætt er að fullyrða Kammersveitinni hafi tekist ætlunarverk sitt því hún hefur átt fastan sess í tónlistarlífi höfuðborgarinnar síðan. Félagar í Kammersveitinni eru virkir þátttakendur í tónlistarlífi Íslendinga, margir þeirra meðlimir í Sinfóníuhljómsveit Íslands og ýmsum öðrum hljómsveitum auk þess að stunda tónlistarkennslu. Rut Ingólfsdóttir hefur lengst af verið leiðari sveitarinnar og listrænn stjórnandi. Nú hefur Una Sveinbjarnardóttir tekið við sem konsertmeistari Kammersveitar Reykjavíkur. Kammersveit Reykjavíkur kemur fram í misstórum hópum, allt frá 3 til 40 manns, en stærð hópsins ræðst af þörfum tónverkanna hverju sinni. Kammersveitin er kunn fyrir fjölbreytt verkefnaval og góðan flutning. Hún hefur frumflutt fjölda íslenskra og erlendra verka sem samin hafa verið fyrir hana og ennfremur staðið fyrir íslenskum frumflutningi þekktra erlendra verka. Á undanförnum árum hefur Kammersveit Reykjavíkur lagt áherslu á upptöku og útgáfu íslenskra verka m.a. þeirra fjölmörgu tónverka sem íslensk tónskáld hafa samið sérstaklega fyrir hana. Þessir geisladiskar endurspegla þá listrænu samvinnu, sem Kammersveitin hefur átt við helstu listamenn landsins í gegnum tíðina. Ennfremur hefur Kammersveitin gefið út geisladiska með klassískum verkum m.a. Brandenborgarkonserta Bachs, en fyrir þá útgáfu hlaut Kammersveitin Íslensku tónlistarverðlaunin 2003. Kammersveit Reykjavíkur hefur tvívegis verið tilnefnd til Tónlistarverðlauna Norðurlandaráðs; árið 2005 og aftur árið 2015. Nýlega kom út geislaplata á vegum Sono Luminus: Windbells, þar sem Kammersveitin leikur verk eftir Huga Guðmundsson.

Hugi Guðmundsson (1977) nam tónsmíðar og raftónsmíðar við Tónlistarskólann í Reykjavík, Konunglegu tónlistarakademíuna í Kaupmannahöfn og Sonology stofnunina í Den Haag.

Hann hefur hlotið fjölda viðurkenninga og verðlaun fyrir list sína og má þar nefna íslensku tónlistarverðlaunin fjórum sinnum, Kraumsverðlaunin, þrjár heiðurstilnefningar á alþjóðlega tónskáldaþinginu og fyrstu verðlaun í tónsmíðakeppni Norrænna músíkdaga í Finnlandi 2013.

Hugi hlaut Bjartsýnisverðlaunin árið 2014 og það ár hlaut hann einnig hæsta styrk sem veittur er af danska ríkinu til tónskálda en hann er í formi þriggja ára starfslauna. Aðeins eitt tónskáld úr hverjum tónlistargeira hlýtur þennan styrk ár hvert.

Stærsta verk hans til þessa er óperan Hamlet in absentia en fyrir hana hlaut hann íslensku tónlistarverðlaunin 2016 en það var annað árið í röð sem hann vann þau verðlaun. Óperan var jafnframt tilnefnd til hinna virtu Reumert sviðslistaverðlauna sem óperuuppfærsla ársins í Danmörku og vann verðlaunin í tveimur öðrum flokkum, m.a. fyrir handrit ársins. Óperan var tilnefnd til Tónlistarverðlauna Norðurlandaráðs, 2018 og var það önnur tilnefning Huga til þeirra verðlauna.

Hugi býr og starfar í Danmörku.

Heimasíða Huga

Ingibjörg Ýr Skarphéðinsdóttir hóf tónsmíðanám við Listaháskóla Íslands haustið 2013. Helstu leiðbeinendur hennar voru Hróðmar I. Sigurbjörnsson og Anna Þorvaldsdóttir. Hún útskrifaðist þaðan vorið 2016 og hóf þá um haustið hálfs árs starfsnám hjá Önnu Þorvaldsdóttur á Englandi. 

Ingibjörg hefur unnið með leikurum, sviðshöfundum, leik-, dans og kammerhópum og kvikmyndagerðarmönnum. Frá útskrift hefur hún tvívegis hlotið styrk frá Tónskáldasjóði RÚV og vinnur nú að hljóðritun á verki sínu Hulduhljóð að handan ásamt Lilju Maríu Ásmundsdóttur. Var það verkefni styrkt af Hljóðritasjóð RANNÍS.

Daníel Bjarnason er eitt fremsta tónskáld Íslands og hefur hann unnið með og fengið verk sín flutt af fjölda hljómsveita og má þar nefna Sinfóníuhljómsveit Íslands, Fílharmóníusveitirnar í Los Angeles og New York, Sinfóníuhljómsveitirnar í Toronto, Winnipeg, Melbourne og Adelaide, Sinfóníuhljómsveit BBC í Skotlandi, Residentie-hljómsveitina, Ulster-hljómsveitina, Britten-sinfóníuna og Sinfóníettuna í Kraká. Hann hefur gefið út fjórar plötur hjá plötufyrirtækinu Bedroom Community, Processions (2010), Solaris (2012), Over Light Earth (2013) og Collider (2018). 

Meðal helstu verka Daníels eru óperan Brothers sem sýnd var á Íslandi á Listahátíð í Reykjavík, við mikla hrifningu og fiðlukonsert, sem var pantaður af Fílharmóníusveit Los Angeles og Sinfóníuhljómsveit Íslands, og frumfluttur af Pekka Kuusisto og fyrrnefndu sveitinni undir stjórn Gustavos Dudamel í Hollywood Bowl. Daníel hefur gegnt stöðum staðarlistamanns og aðalgestastjórnanda Sinfóníuhljómsveitar Íslands og gegnir nú stöðunni „listamaður í samstarfi“.