MÖRSUGUR (ljóðsaga fyrir rödd með rafhljóðum og myndbandsverki)
Heiða Árnadóttir, Ásbjörg Jónsdóttir og Ragnheiður Erla Björnsdóttir
Harpa Norðurljós
19:00
25. janúar
Mörsugur er ópera fyrir rödd með rafhljóðum og myndbandsverki, byggð á ljóðsögu eftir Ragnheiði Erlu Björnsdóttur. Ljóðsagan er brotakennd frásögn með útúrdúrum sem gerist í þjóðsagnakenndri íslenskri náttúru. Erkitýpurnar sem persónan er byggð á eru goðsagnakenndar kvenfyrirmyndir. Í verkinu er reynt að ná utan um þokukennt hugarástand konu sem er á milli heima, á milli ljóss og myrkurs og þar sem minningar og raunskynjun renna í eitt. Verkið er unnið í samsköpunarferli Ásbjargar Jónsdóttur, Heiðu Árnadóttur og Ragnheiðar Erlu Björnsdóttur. Myndbandsverk er eftir Ásdísi Birnu Gylfadóttur.
Efnisskrá
MÖRSUGUR (ljóðsaga fyrir rödd með rafhljóðum og myndbandsverki) Tónskáld: Ásbjörg Jónsdóttir og Ragnheiður Erla Björnsdóttir/ Ljóðsaga: Ragnheiður Erla Björnsdóttir / 2022 "50 - frumfluttingur
Teymið
Rödd: Heiða Árnadóttir
Tónskáld: Ásbjörg Jónsdóttir og Ragnheiður Erla Björnsdóttir Dramatúrgur : Kolbrún Anna Björnsdóttir
Myndbandsverk: Ásdís Birna Gylfadóttir
Sviðsmynd og búningur: Heiða Eiríksdóttir
Flytjendur og tónskáld
Ragnheiður (Heiða) Árnadóttir, söngkona, hefur lagt ríka áherslu á flutning nútímatónlistar, sem og þjóðlaga-, djass-, tilrauna, og ljóðatónlistar. Hún hefur frumflutt fjölmörg verk íslenskra tónskálda, þar á meðal eftir Gunnar Karel Másson, Ásbjörgu Jónsdóttur, Þórunni Björnsdóttur Þórönnu Björnsdóttur, Guðmund Stein Gunnarsson og Þórunni Grétu Sigurðardóttur.
Ásamt fjölda tónleika á Íslandi, þar sem hún hefur meðal annars frumflutt verk með Ensemble Adapter og Caput, hefur Heiða einnig komið fram í Hollandi, Belgíu, Frakklandi, Indlandi, Svíþjóð og Danmörku. Hún hefur flutt verk á Norrænum músíkdögum, Iceland Airwaves, Sumartónleikum í Skálholti, Þjóðlagahátíðinni á Siglufirði, Jazzhátíð Reykjavíkur og ýmsum hátíðum erlendis líkt og á hátíðartónleikum á heimstónlistarhátíðinni WOMEX í Kaupmannahöfn.
Heiða er lagahöfundur, textaskáld og söngkona í hljómsveitinni Mógil sem hafa gefið út fjórar plötur. Platan þeirra Ró, sem gefin var út af Radical Duke í Belgíu og var nýjasta plata þeirra, Aðventa, gefin út af hinu virta útgáfufyrirtæki Winter and Winter í Þýskalandi.
Ragnheiður Erla Björnsdóttir er tónskáld, ljóðskáld og raddlistakona búsett í Vínarborg þar sem hún stundar doktorsnám í listrænum rannsóknum. Hún lauk meistaraprófi í ritlist frá Háskóla Íslands vorið 2018 og bakkalárprófi í tónsmíðum frá Listaháskóla Íslands árið 2016. Ragnheiður er meðlimur í listhópnum Hlökk, hljóð- og myndbandskollektívinu SÚL_VAD og austurríska listarýminu Die Labile Botschaft.
Hún stundar þverfaglegar rannsóknir á röddinni frá sjónarhorni líkamningu (e. embodiment) og vistfræðilegrar tónlistar. Verk Ragnheiðar hafa verið flutt alþjóðlega í margvíslegum birtingamyndum, allt frá hljóðinnsetningum í skógi til leikrænna raddverka. Hún notast gjarnan við aðferðarfræði afbyggingar (e. deconstruction) í leit að nýjum merkingum, sögum og tengingu við ókunnug svæði.
Ásbjörg Jónsdóttir er tónskáld, píanóleikari og söngkona. Hún lauk BA gráðu í tónsmíðum frá Listaháskóla Íslands árið 2014 og MA gráðu frá sama skóla árið 2018. Ásbjörg stjórnar barnakór og kennir hljómfræði og píanóleik. Tónlist Ásbjargar hefur m.a. verið flutt af Caput, Hljómeyki, Duo Harpverk, Elektra Ensemble, Dómkórnum í Reykjavík og IMPRU. Þá hafa verk hennar verið flutt á Myrkum músíkdögum þrisvar sinnum; af Duo Harpverk árið 2012, af Foot in the Door 2015 og af Heiðu Árnadóttur 2019. Hún hefur breiðan tónlistarlegan bakgrunn, allt frá djasssöng til kórastarfs en hefur þroskað tónsmíðagáfu sína jafnt og þétt í eftirminnilegum kammerverkum sem sameina léttleika og ljóðrænu.
Ásbjörg hefur einnig tekið að sér önnur verkefni í tónlist svo sem upptökur, útsetningar og rannsóknir. Ásbjörg vinnur um þessar mundir að rannsókn um jazz á Íslandi í samstarfi við Þorbjörgu Daphne Hall og Oxford University Press. Þá kom út bók með 12 nýjum barnalögum eftir Ásbjörgu í apríl 2019.
Ás Dís (Ásdís Birna Gylfadóttir) er myndlistarkona, en hún útskrifaðist með BA gráðu í myndlist frá AKI ArtEZ í Enschede, Hollandi sumarið 2022. Verk eftir hana hafa verið sýnd á Íslandi, í Svíþjóð, Danmörku, Hollandi og Austurríki. Helsta tjáningarform hennar eru myndbönd, í bland við gjörninga, tilraunakennda hljóðhönnun og innsetningar. Í verkum sínum rannsakar hún hugsanaferli sitt og hversdagsleikann, yfirþyrmandi hugsanir og stjórnleysi umhverfisins og leitast hún eftir því að lýsa því sjónrænt sem erfitt er að tjá með orðum. Ásamt tónskáldinu Ragnheiði Erlu stofnaði hún listakollektívið SÚL_VAD, einnig er hún meðlimur í RASK, hópi ungra íslenskra listamanna sem vinna þverfaglefa á sviði lista og nýsköpunar.
